Պետք է փորձել «կոտրել» ստիգման. Գագիկ Միրիջանյան

Օրերս Վրաստանից վերադարձած «Նորք» հոգեբուժական կենտրոնի  պատվիրակության անդամները՝ Գագիկ Միրիջանյանի գլխավորությամբ, արդյունավետ են համարում աշխատանքային այցը: Այն սկիզբ է դրել համագործակցության` երկու համաձայնագրերի ձեռքբերմամբ և նոր կապերի ամրապնդմամբ:

Տնօրենի ժամանակավոր պաշտոնակատար Գ. Միրիջանյանը նշում է. « Մենք ցանկություն հայտնեցինք տեղում ծանոթանալու Վրաստանի առողջապահության ոլորտին և ստացանք օպերատիվ արձագանք վրաց գործընկերներից: Նախքան մեկնելը առաջարկել էինք մի քանի կենտրոնների, մասնավորապես, երկու հոգեբուժական կենտրոնի հետ կնքել համագործակցության համաձայնագրեր:

Նմանատիպ համաձայնագիր առաջին անգամ է կնքվում մեր երկրի հոգեբուժության ոլորտում... Մեր նպատակն է համաձայնագրերում նշված բոլոր կետերն իրականացնել մոտակա տարիներին, որի արդյունքում, վստահեցնում եմ, այն հաջողությունները, որոնք ուզում ենք տեսնել ոլորտում, անխուսափելի կլինեն»:

Գ. Միրիջանյանի փոխանցմամբ՝ հանդիպման ընթացքում վրաց գործընկերները ցանկություն են հայտնել Հայաստան գալ և տեղում ծանոթանալ Հայաստանում հոգեբուժության ոլորտում ձեռքբերումներին. «Հայ և վրաց ժողովրդի միջև ընդհանրությունները շատ են: Մենք մոտ ենք թե՛ աշխարհագրական դիրքով, թե՛ ազգային մտածելակերպով: Մասնավորապես, հեռու չեն նաև հոգեբուժության ոլորտի խնդիրները` նաև այն պարզ պատճառով, որ խորհրդային միության գերհզոր առողջապահական համակարգի փլուզումից հետո անկախությունը նույն խնդիրները դրեց երկու երկրների առջև, որոնք պետք է լուծվեն: Յուրաքանչյուրս իր ընտրած ուղղություններով է փորձում հաղթահարել այս կամ այն խնդիրը, ինչն առավել դյուրին կդառնա միասնական ուժերով»:  

Անդրադառնալով հոգեբուժության խնդիրներին՝ Գ. Միրիջանյանն ասաց. «Վրաստանի առողջապահության նախարարությունը բարեփոխումների ծրագիր է իրականացնում առողջապահության տարբեր ոլորտներում. ներկայում կիզակետում է հոգեբուժության ոլորտը: Հարկ եմ համարում նշել, որ Վրաստանի հանրապետությունում հոգեբուժական կենտրոնները գործում են պետական հովանավորության ներքո»:

Գ. Միրիջանյանը գտնում է, որ երկու երկրների ինստիտուտները բավականին լուրջ ավանդույթներ ունեն և ժամանակի ընթացքում այդ կապն առավել ամրապնդել է պետք:

«Մենք ունենք բավականին մեծ գիտական և մասնագիտական ներուժ. դասական ամբիոն, բարձրակարգ մասնագետներ, ինչը փաստում էին նաև մեր ոլորտին տեղյակ վրաց գործընկերները: Մենք մեր պատրաստկամությունն ենք հայտնել կիսվել նրանց հետ մեր փորձով: Արդեն գալիք տարվա ընթացքում վրաց մասնագետներ կգործուղվեն Հայաստան»: 

Գ. Միրիջանյանը փաստեց, որ Վրաստանի հանրապետությունում գործող հոգեբուժարանները գտնվում են բարվոք վիճակում` վերանորոգված են և կահավորված: «Չեմ թաքցնում, որ այսօր մեր հոգեբուժարաններն անգամ անմխիթար վիճակում են: Հայաստանում ևս ձգտելու ենք բարձր նշաձողի` ՀՀ Առողջապահության նախարարության օժանդակությամբ: Վստահ ենք, որ կհասնենք հաջողությունների` և ո՛չ միայն վիզուալ սպառազինելով հոգեբուժարանները»:

Պարոն Միրիջանյանը գտնում է, որ առանց հասարակության ընդգրկվածության չենք կարող առաջընթաց ապրել: Պետք է փորձել «կոտրել» ստիգման՝ հոգեկան խանգարումներ ունեցող մարդկանց նկատմամբ մերժողական վերաբերմունքը: «Ոլորտը բավականին հուզական է: Ակնկալում ենք հասարակության լայն շերտերի ընդգրկվածությունն իրենից ծագող բոլոր խնդիրների լուծման գործընթացում: Այսօր Առողջապահության համաշխարհային կազմակերպությունը մեծ ուշադրություն է դարձնում հոգեկան առողջությանը: Ցավոք, մեզանից յուրաքանչյուրը երաշխավորված չէ այդ խնդրի կողքով անցնելու, դա սպառնում է բոլորիս: Մենք պետք է «կոտրենք» մեր մեջ եղած ստիգմաները և փորձենք միասին լուծել այն բոլոր խնդիրներն ու մարտահրավերները, որոնք առաջացել են ոլորտում»:

 
«Նորք» հոգեբուժական կենտրոնի առաջիկա պլանների մասին Գ. Միրիջանյանն առայժմ չի ցանկանում խոսել. «Վրաստանում տեսանք այն ուղղությունները, որոնք արժե կիրառել, թույլ տվեք չբացել փակագծերը: Միայն կարող եմ նշել, որ մենք  ճիշտ ուղղու վրա ենք: Ավելին, ներքին որակի  վերահսկողության մի քանի փաստաթղեր կան, որոնք նախատեսում ենք կիրառել մեր կենտրոնում արդեն հունվարից` թեկուզ տնօրենի հանձնարարականով: Խոսքը սննդի որակի և դեղորայքի վերահսկողության, հիվանդի ներգրավվածության մասին է և` ո՛չ միայն»:

Զրույցի վերջում Գ. Միրիջանյանն ասաց, որ շատ կարևոր է նաև հոգեկան խանգարումներ ունեցողների հարազատներին կրթելը: «Նրանք պետք է տեղյակ լինեն, թե ինչ խնդիր ունի իրենց հարազատը, ինչը գիտակցական մակարդակով կդարձնի նրանց  առավել ուշադիր և նրբանկատ»:

Հարցեր, պատասխաններ, մեկնաբանություններ